2013-06-15

عزيزي في نص الكوكب التاني..



عارف الأوقات اللي بيبقى فيها نفسك تتكلم مع حد عشان يجاوب على أسئلتك اللي بتتعبك.. يحللك كل مشكلة ويمسك إيدك ويوريها مكان الدفا فين.. ويعرفك النور بييجي منين.. ويسيبك وانت مرتاح ومطمن؟
عارف الوقت اللي بيبقى نفسك فيه تعرف ربنا بيحبك ولا لا؟ زعلان منك ولا راضى عنك؟ بيبعتلك التعب والإبتلاء حب ولا عقاب؟ لما تفقد الأمل وتبقى يئوسٌ قنوط.. لما تبقى مش عارف إنت كده نجحت في الإختبار ولا فشلت فشل ذريع.. عرفت معنى الصبر ولا استسلمت للجزع وسخطت على قدر ربنا وأنكرت حكمته.. 
عارف اللحظات اللي بتشك فيها ف نفسك وبيبقى نفسك حد يطمنك إنك مبعدتش أوي عن الطريق.. إن لسة جواك خير ولسة باب ربنا يساع؟
عارف لما تبقى خايف تبقى من الذين ضل سعيهم في الحياة الدنيا وهم يحسبون أنهم يُحسنون صنعا؟
عارف الضلمة ودوامة الأسئلة دي؟

طب تعرف طريق يساعدني اخرج من جوا دماغي..؟
 عشان أنا بجد تايهة.

----

For the love of Paracetamol. 

عزيزي اللي ف نص الكوكب التاني اللي كنت تعبان زيي كده وبتدور مستميتاً على علبة الدوا ولما أخيراً لقيتها طلعت فاضية أحب أقولك إن فيروز تقدر تلمس التعب وتنسيك كل همومك ف ثانية.. ولو مش بتحب فيروز ممكن أغنية حلوة من حد من اصحابك تبقى كفيلة بإنها تريحك مؤقتاً لحد ما حد ينزل يجيبلك دوا من الصيدلية عشان مش هينفع أنا وانت نستنى كده كتير..

أحب أقولك برده إن في قلوب عندها استعداد تجيبلك بلالين كل الألوان اللي تحبها وترسملك عليهم وشوش بتضحك بس عشان يشوفوك مبسوط.. عندهم استعداد يشيلوا ابتسامة من على وشهم ويدوهالك.. أو عندهم استعداد حرفياً يشيلوا قلبهم من جوا ويحطوه مكان قلبك التعبان عشان ترتاح.. والأخير مش هتلاقيه غير ف حد بيحبك أكتر من نفسه زي مامتك.. أو لو كنت محظوظ كفاية إن حد يشوف فيك حاجة تستاهل كل الحب ده ويديهولك..

عزيزي لو لسة محدش جابلك دوا انا ممكن أدعيلك ربنا يخفف عنك.. وممكن أنا وانت نرمي بكل قوة الكتب من على السرير ونتقوقز على أمل إن الوجع يخف من تلقاء نفسه.. وعلام يأذن الفجر ف ودنك تكون الملايكة تكفلت بالموضوع ده.. وتكون أقزامي الهربانين وصلوا عندك وحلمت حلم كويس.. إنك تعدي امتحانك اللي انت خايف منه أو تتجوز البنت اللي بتحبها أو حتى إنك تصطبح بوش حلو.

أو ممكن تفضل معايا شوية لحد ما أزهق من الكلام.. ممكن؟

مش هزعجك بهرتلة غير منطقية كالمعتاد.. أنا بس هقولك متقلقش حد عليك تاني.. عشان ممكن تكتشف ف الآخر إن تعب الحد ده غالي أوي عليك.. وهقولك إن الشيكولاتة مفعولها قوي ولازم تلجألها كحل أولي وأخير وبلا دايت بلا بتنجان اسمع مني.. وإن في حشرات سخيفة ممكن ترخم عليك وتقرصك في كل مكان بس هتشفق عليها في الآخر لما تلاقي بشر بيعملوا زيها وبيمصوا دم البني آدمين من كل مكان برده لمجرد إن البني آدمين دول فاقدي الحيلة قدامهم.. ساعتها هتتساءل هوا ليه مفيش مبيد آدمي مفيد للحشرات الآدمية دي؟ هتحس ساعتها بهتلر بيزن ف ودانك وهتلاقي نزعة سادية من اللامكان جواك وغالباً مش هتقلق لأن قرف البشر هو اللي بيدفعك لكده.. عادي.

آه لسة بحب العواجيز.. خصوصاً بعد اكتشاف مذهل لكارل وإيلي حقيقيين.. كل يوم الصبح بتنزل معاه وتمشي بخطوات بطيئة زي خطواته وتوقفله التاكسي عشان يروح النادي وترجع هيا لشغلها في البيت.. الاتنين طول بعض تقريباً وملامح وشهم متفرقش كتير.. نفس التجاعيد ونفس الطرق اللي حفرها الزمن ف وشهم.. لما بشوفهم الصبح يومي بيبقى مبسوط وبيضحكلي عشان بحس بأمل إني هبقى زيهم كده وألاقي كارل طولي :).. صحيح من ساعة ماتحطت صورتهم cover لجروب دفعتنا وأنا متشائمة بس الواقع أحلى.. أحلى كتير.. وأتمنالك عزيزي انت كمان إنك تلاقيلك إيلي تبقى شبهك.. وطولك برده.. :)

مريم قالتلي مرة "the safest place is to be in someone's prayers".. وفي ناس كتير محتاجين دعوة بظهر الغيب توصلهم.. ربنا كريم وهيبعتلهم دفا من حيث لا تدري.. فممكن قبل متتقوقز تدعي لأي حد ييجي على بالك.. افضل ادعي كتير لحد متنسى الوجع.. وادعي لمريم عشان دايماً بتفكرنا بالخير ده.. وادعي لندى كتير عشان محتاجة الدعا والدفا والراحة أوي.. ومتنساش تدعي لنفسك.. وادعيلي..

عزيزي اللي ف نص الكوكب التاني.. رغم إنك زيي مذاكرتش النهاردة حاجة بس هنخلي عندنا أمل إن بكرة يبقى أحسن. 
وإن شاء الله بكرة يبقى أحسن.

تصبح على خير. 
:)





هناك 11 تعليقًا:

  1. ان شاء الله بكرة علطول يبقى أحسن :)

    ردحذف
    الردود
    1. إن شاء الله.. ليك كمان يا عمر :)

      حذف
  2. 7ader msh ha2le2k tany :) rabna ye5aleke lya <3


    w ah wel naby ed3olna e7na 8alaba wallahy :)

    ردحذف
  3. ايه دا يا جدعان !!! :D
    بقالي اسبوع بخش على تويتر عشان ادور على تدوينة جديدة بس تاهت وسط باقي التويتات...الحمد لله ان لحقتها قبل الشرعي :) :D

    ردحذف
    الردود
    1. بس انا اللي مش فطن...ليه مبخشش أدور هنا على طول :D

      حذف
  4. حلوة اوى يا ضحى، ربنا يباركلك والله.

    ردحذف

:)