2013-05-13

عن شوية الحب اللي جوانا.. :)



في حب السما.. والسحاب الأبيض اللي بيشعلق عيون الناس بيه ويغريهم عشان يرسموا احلامهم.. في حب الشمس اللي الساخر عفيفي بيحبها عشان بتطلعله الملوخية.. وف حب الملوخية وتمارا.. وف حب عفيفي الكاتب العجوز اللي بيحب يشرب الشاي بالياسمين وبيعدي فوق النمل بخطوات كبيرة عشان ميموتوش.. في حب العواجيز وخطوط وشهم اللي بترسم ضحكاتهم من غير ميضحكوا.. وف حب التضاريس اللي بيسيبها الزمن فوق وشوشهم والتعب اللي بيسيبه ف عيونهم وسنانهم المكسرة وعضمهم الخفيف.. ف حب شعرهم الأبيض اللي من كتر ما شالوا الهم فوقيه كره السواد والغم.. وقلوبهم اللي مبقاش فيها زعل لحد.. 

في حب الفراولة والناس الرايقة.. والخوخ وألوانه والعصير اللي بيتحول جوا بقك لذرات سكر محسوبة بالمللي.. ف حب المانجا اللي دايماً يعزمني عليها أخويا.. وف حب ريهام والبرتقال والهوت سيدر اللي بقيت بحبه بسببها.. في حب ضحكة ندى وروقان منار وقلب مريم و رخامة القلش بتاع شاهندة وكل الناس اللي بيعرفوا يرسموا ضحكة على قلبي حتى لو مبانتش عليا.. ف حب الحياه ف وجودهم.. وف حب الفراغ اللي بيخليهم يوحشوني واللي بيسيبوه ف غيابهم.. ف حب الزرافة أكتر مخلوق أنيق على ضهر الكوكب.. وف حب الفيل ووالسمك ودوري وسيد.. ف حب خلق ربنا اللي بيشاورلك على الجمال لما تتعب من كتر القرف.. وف حب البحر والبراح اللي دايماً بتدور عليه لما زحمة الحياة تملاك..

في حب المزيكا وريتك معايا.. وف حب ألان جاكسون لما يغني remember when وف حب فرانك سناترا لما يوديني في ليلة صافية لباريس.. ولما يقولي I won't dance madam with you.. ف حب الجيتار الأسباني والعود الشرقي.. وف حب الشعر والروايات والرافعي.. ف حب أحلام لما تدخلني متاهاتها وتطلعني مبسوطة بالتوهان.. وف حب جبران ودرويش وبهاء طاهر وأي حد قريتله كلمة واتحفرت ف دماغي وعلمتني حاجة.. ف حب أمل دنقل اللي كتابه مش معايا.. وف حب مصطفى محمود اللي زي ما حد قال.. "لحم دماغي من خيره"

في حب السهر ونسمة الهوا السقعانة.. وف حب البنات والكوفيات الصوف الملونة.. وف حب نضارة أخويا الجديدة اللي شبه نضارتي.. ف حب أخويا ذات نفسه.. وف حب أهلى اللي دايماً مغرقيني دفا.. ف حب ماما اللي مسبتش تفصيله فيها إلا وخدتها.. وف حب الحاج اللي دايماً يزعقلي عشان بقعد عالنت كتير.. وف حب أخويا الصغير اللي دايماً ميسيبنيش أعدي الشارع لوحدي ويقولي البتاع ده ضيق و يسألني رايحة فين مع إنه عارف أني كل يوم بروح نفس المكان.. بس بيحب يطمن..

في حب القعدة لوحدي ساعات..  وف حب التفكير فيك أحياناً.. وف حب الإبتسامة الحلوة اللي بتسحر أي حد.. وف حب الضحكة الساذجة التلقائية لما تطلع من غير ماتشيل حمول الدنيا معاها.. ف حب الشغل والزنقة.. وف حب المذاكرة مع إنها مش راكبة.. ف حب التعب اللي بيهد الحيل والسعادة اللي بتلاقيها لما تعمل حاجة بضمير.. ف حب كرم ربنا لما تقصّر ويديك.. وف حبه لما يطبطب عليك ويقولك معلش.. حاول كمان مرة.

في حب الشاي بالفاكهة والقهوة.. والشيكولاتة لما تجيلي هدية.. ف حب الرسم والألوان المجنونة.. في حب الأحمر اللي دايماً بيزعق.. والأصفر اللي بيحب دايماً يفضل لوحده.. وف حب الأزرق والموف والأسود اللي مزاجهم دايماً متقلب.. وف حب الأبيض بس لما يكون على ورقة مستنية حد يكتبها.. أو لوحة رسم مستنية الفكرة..

ف حب الشارع والمشي ف وسط الزحمة.. وف حب خيالي لما يوديني لحتت مش سالكة.. ف حب حياتي اللي مقلوبة من فوقها لتحتها.. وف حب حب ربنا ليا لما يبعتهولي مستخبي جوا ابتلاء.. وف حب الطرق الطويلة والدواير اللي بتلف بيا وترجعني لنفس النقطة.. وف حب كل الأخطاء والغلطات والمواقف السخيفة البايخة.. في حب الشدة والعياط وقصر النفس.. وف حب الفرج لما ييجي بعد آخر ذرة أمل..

في حب القرآن.. وصوت عبد الباسط وطوبار.. والمنشاوي والنقشبندي.. وف حب الراحة النفسية لما ربنا يكلمني.. في حب الصلاة عالرسول اللي بتفرج أي هم.. وف حب السيرة والصحابة.. وأبو بكر وعُمر.. ف حب الجنة.. وحب الوحشة بعيد عنها.. 
في حب ربنا اللي كل جمال هو مسحة منه.. وكل مكروه هو ابتلاء منه.. وكل نعمة هي فضل منه.. وكل قضاء هو خير منه.. ف حب الحب اللي ربنا أودعه جوانا.. وف حب قلوبنا اللي بين صوابعه يقلبها كيف ما يشاء..
في حب اليأس والحزن في البعد عنه.. وف حب الراحة ف القرب منه.. ف حب البكاء خشوعاً وخشية.. وف حب العبادة.. حباً ورغبة.

في حب الإبتسامة لما تحس إن ربنا راضي عنك.. وف حب الإحساس اللي بيملاك زعل من نفسك لما يكون غضبان عليك..
وف حب وقفتك قدامه.. وخبطتك على بابه.. وطلبك الرحمة منه.
وف حب الدعا.. وقولة يارب.

:)

هناك 6 تعليقات:

  1. في حبك، سيدتي، حين يستقر في الفؤاد لا يري معه في الوجود قبح

    ردحذف
  2. fe 7ob 2alb mby3rafshy ykrah 7ad wala y7qed 3 7ad wala y2zy 7ad,, 2alb kbeeeeeeer bgad ysa3y el denia wema feeha
    2lbek enty <3

    ردحذف
  3. وفى حب الطيبه والحنيه الى بيشعوا منك :)

    ردحذف
  4. انا وصلت للصفحه دى بالصدفه .. لكنها صدفه جميله خلتنى اقرا الكلام الجميل ده .. ربنا يزود الحب جواكى وحواليكى كمان وكمان

    ردحذف

:)