2013-04-13

قول يا رب..


goodnight neverland


ولأنه دايماً كريم معاك.. حتى وقت أما تخذله.. 
ولأنه عمره ما خاب فيه رجاء.. 
ولأنك مهما عصيت هتفضل رحمته تساعك.. 
ومهما بعدت هيفضل بفضله يقبل قربك تاني..

ولأنك ضعيف..
جهول..
فاقد الحيلة..
هتفضل طول عمرك تلجأله وقت الضيق..
ولأنك جحود
نساي..
أناني..
هتفضل طول عمرك تنساه وقت النعمة..

ولأن كل باب غير بابه هييجي يوم ويتسد ف وشك..
وكل طريق غير طريقة مليان حفر..

ولأن كل حاجة ف إيدك أمانة.. 
والأمانة اللي انت شيلتها تقيلة على كتفك..
فهتفضل دايماً تظلم نفسك..
وتظلم كل اللي حواليك معاك..


وهتفضل دايماً تشوف النور وتعمل نفسك مش شايفه..
وتعيش في الضلمة وتستخبى عشان بتريحك أكتر..

عشان أنت بتخاف من نفسك لأنها دايماً بتهزمك..
ولأنك معندكش شجاعة تتخانق.. 
فعمرك مهتكسب..

ومش كل مرة هتفضل تقول .. ربي غفورٌ رحيم..
لازم برده تفتكر إن عذابه هو العذابُ الأليم.

بس ابقى حاول.. 
حاول متبطلش قولة يارب..
يمكن دي اللي يوم تنجدك..

---

هذا البلوج مغلق للصيانة.
نأسف للإزعاج والدوشة..
وشوية الإكتئاب اللي اتسرب سهواً من هنا..

هناك 4 تعليقات:

  1. ليه بس كده , أنا حزين بجد :(

    يارب ترجعي زي الأول وأحسن كمان ..

    ردحذف
  2. يااارب....ترجعى تكتبى بالسلامة بقى :)

    ردحذف
  3. ان شاء الله هترجعى تكتبى واحسن من الاول كمان مع انى شايفه ان مفيش احسن من كدا ومش مجامله :]

    ردحذف

:)