2012-11-01

أزمة Serotonin



مفيش أبطال على أرض الواقع .. ف حواديت قبل النوم بس هتلاقيهم .. 
ومفيش أميرة جميلة ولا مملكة ضايعة ولا تاج مش لاقي اللي يلبسه .. 
ومفيش ورد بيغني .. ولا مطر بيعرف يعزف فيولين ..
مفيش أقزام ولا جنيات .. ولا حتى سنووايت كان عندها مرات أب شريرة .. 
ومفيش قمر لونه برتقالي .. ولا نجوم غيرانه منه ..
وكارل وإيلي كانوا حلم جميل استمر لمدة عشر دقايق بس قبل متصحى من النوم .. 
وwall-e مجرد روبوت صغير ميعرفش حاجة عن الحب .. وبس

عن الأحلام اللي بنرسمها وبتطلع فجأة غير واقعية بالمرة .. زي احتمالية إنك ممكن تلاقي شجرة جوز هند ف البلكونة من محض الصدفة البحتة .. ونفس احتمالية إن منير يطلعلك لسانه وهو بيغني "قبل متحلم فوق احلم وانت فايق" .. كلها أحلام ستبدأ في النهاية بكلمة "مفيش" !
 -----


عارف يعني إيه هَوَّس ؟

يعني تتفرج على فيلم أربع مرات وتجيب لقطاتة من على اليوتيوب لما تكون مش فاضي تتفرج عليه لمجرد إنك تشوف لقطة أو اتنين منه .. عشان تزغزغ قلبك السقعان من جوا فتحس بدفا.
-----


ساعات بيبقى الكلام عن اللي بنحسه مش حاجة healthy .. عشان أوقات الحاجات اللي بنحسها دي لازم تفضل مستخبية جوانا .. عشان لو طلعت ممكن توجعنا .. أو حتى توجع غيرنا .. 
وكتير برده لأن أوقات بتسمع ف الخلفية من بعيد وانت بتتكلم صوت حد بيزعق وبيقول WHO CARES!
-----


بحاول مفتقدش حاجة .. أو حد
لأن الراحة طريقها واحد بس .. انك تدي لأي حاجة cold shoulder !
----


الفكرة مش في السؤال أنا كويسة أو لا ..
الفكرة في أن الدمعتين اللي بينزلوا في الخفا دول ميسيبوش أي أثر على وش بيضحك .. 
وإن الضحكة تبقى بجد.
----


لما كل اللخبطة تحصل ف مكان كنت دايماً لما الدنيا من حواليك تتشقلب وتحس إن حياتك كلها غلط تلاقي المكان ده منور وبيبعت دفا
لما تلاقي ربنا بيسدلك كل منافد الهروب إلا عنده هو وبس ..
اعرف إن ربنا بيحبك .. وبيحبك أوي كمان.
----


صحيت من النوم .. وقررت أصلح اللي كسرته .. 
ورجعت آخر اليوم بحاجات كتير على وشك الإلتئام ورجل بتتقطع من الوجع.
وحبة زعل.
----


التصالح مع النفس .. دي كلمة مكلكعة .. !
هنسميها breaking the ice ..
وبعدين نبقى نتعاتب ونتصالح ونرجع زي زمان براحتنا .. السنة لسة طويلة.
 ----


 وبقيت كل أما عيني تلمحك مبحسش غير حاجة واحدة بس .. 
مش عاوزة أبداً أكون سبب في تعب حد!
----


كنت مؤمنة إيمان كامل بإن مهمتي في الحياة واحدة ومش هتتغير ..
ودلوقتي بدأت أقتنع إن كل حاجة بتتغير ..
حتى لو كان التغيير ده مجرد تأقلم ومجاراه للواقع .. 
حتى لو كان تغيير من برا بس.
----


تفتكروا لو كان أمل دنقل عايش كنا هنبقى أصحاب؟
وكان هيرد على جواباتي؟ ويدور معايا على إجابات أسئلتي؟
ويضحك على خيالاتي الطفولية الساذجة؟ 
مش لازم تجاوبوا على فكرة .. 
----


الشعر الطويل عاوز فيونكة روز منقطة ..
بس هنجيبها منين دي؟ 
 ----


 -أنا باكل شيكولاتة كتير اليومين دول يا دكتور ! 
-عادي.. أزمة serotonin وهتروح لحالها .. بس نكتر الألوان شوية .. ونقلل الحوادق من الذكريات والتفكير وخلافه .. وياريت متبصيش تاني لورا .. وكمان الزعل ده .. بلاش منه!

.

Run forest, RUN!

هناك 4 تعليقات:

  1. ساعات بيبقى الكلام عن اللي بنحسه مش حاجة healthy

    عشان ممكن منلاقيش حد يفهم اللي اتقال زائد انهم مفهموش العلامات قبل الكلام
    مما يؤدي لغفبة عارمة في التقوقع ..

    ............
    لما تلاقي ربنا بيسدلك كل منافد الهروب إلا عنده هو وبس ..

    مبقاش غير بيبانه اللي باقية :)

    ........
    الشعر الطويل عاوز فيونكة روز منقطة ..
    بس هنجيبها منين دي؟

    انا عندي بس مش شعري طويل ...ممكن ابعتهالك :)

    ......

    عارف يعني إيه هَوَّس ؟


    يعني انا باختصار مهووية بجرايز أناتومي و eternal sunshine كده !!
    شكرا يا داكتورة :D

    ...

    مع تحياتي..
    أنا كنت هنا

    ردحذف
    الردود
    1. الهوس شئ جميل ومفيد للصحة :))
      وأه انا عاوزة الفيونكة :) أي حاجة منك حلوة :))

      حذف
  2. على فكره فى حاجه فعلا إسمها القمر البرتقالى دى ظاهره فلكيه لما تبقى الأرض بين الشمس والقمر المقصود يعنى إحلمى وسبيها على الله

    ردحذف
    الردود
    1. سايباها على الله فعلا :))

      حذف

:)