2012-10-08

ألف سلامة عليا

 

 

"أريدها لا تعرفني ولا أعرفها، لا من شيءٍ إلا لأنها تعرفني وأعرفها.. تتكلم ساكتةً وأرد عليها بسكوتي. صمتٌ ضائعٌ كالعبث ولكن له في القلبين عمل كلامٍ طويل" 

---

 من منطلق مبدأ اللي فات مات بقى وكدهو .. وإن الناس بتتغير وحدث ولا حرج .. وإن كل حاجة حلوة بتسيبنا وتمشي عشان توسع مكان للحاجات الأحلى عشان تيجي .. وإن القطط كائنات فضائية مش هنتأقلم انا وهي سوياً مع إني عاوزاها تعلمني كتير .. ومن منطلق برده إن في ناس واحشاني ومعرفش مين هما .. وإن في ناس معرفهومش بحلم بيهم بيدوروا عليا وأنا مش عارفة أوصلهم وأساعدهم .. وإن الحلم يستاهل كل المعافرة عشان توصله .. مع إني لسة ملقيتوش .. وبعافر معافرة السنين عشان ألاقيه ..


عشان أنا بحب الرافعي وشايفه فيه الرجل المثالي اللي متولدش لسة .. وعشان كده كتبت على أول صفحة في كتابه "لو لاقيت حد شبهه ف زمانا ده هتجوزه" وعشان لما بفتكره بقراله الفاتحة .. آه والله بقراله الفاتحة مع إنه مات من زمان اوي أوي يعني .. بس هو اللي علمني إزاي لما أحب أحب بكل قلبي بجد .. ولما أتجرح وأتوجع برده يبقى بجد .. ولما قلبي يتكلم مسكتوش .. وأسيب عقلي برده يوجهني صح .. علمني أفكر واتأمل وأحس كل حاجة حواليا .. رغم إن أسلوبه مكلكع شوية وألفاظه كبيرة وفخمة كده .. بس كلامه بيتحس من الحتة اللي جوا دي .. وأنا كده هرغي فيه كتير ومش هخلص فدعوني بقى أحبه ف صمت.

---

عارف ..

هو أنا بس مرهقة شوية .. شوية وجع من هنا على من هنا على صداع وشوية دروخة .. بس أهي ماشية .. مع إني مش عاوزة أضايق نفسي بما إن قاعدة الحياة العريضة إن مفيش حاجة ولا حد يستاهل .. وإن الشرعي مادة عسولة ولطيفة وكل حاجة بس ملهاش نصيب ولا حظ ف وقتي .. وإن في اتنين واحشني أوي ولازم أشوفهم بأقصى سرعة عشان كده مش نافع .. ولازم أفتكر أعمل هدية لحد غالى عليا .. وأضحك أول كل يوم وأعافر عشان أجيب الحلم اللي مغلبني ده وأفضل أجري وراه لحد منفسي يتقطع .. عاوزة أشتغل كتير وأتعب عشان أنا عاوزة أتعب مش عشان في حد بيتعبني .. عاوزة أجرب أعيش لنفسي وأجيب كتاب حلو وأقراه وأنا بشرب لاتيه من مكان هادي محدش يلغوش فيه عليا .. وأسمع ماجدة الرومي وأنا بتمشى لوحدي وقت العصرية وببص ف وشوش الناس وأضحكلهم .. يمكن يكون حد مستني ضحكة تفرحه حتى لو من حد ميعرفوش .. هتعلم من الفترة دي إزاي أعمل لنفسي ركن صغير وألاقى لحظة هدوء وسط الكركبة .. ومفيهاش مشكلة يعني إني أستوطن الكنبة بما إن أوضتي الحبيبة مشغولة .. مع إنها كئيبة بس وحشتني .. 

آه على فكرة .. أنا نفسي أعمل حاجة كويسة أصلح بيها شئ ما .. معرفش ده الدافع بتاعه إيه .. شعور بالذنب أو رغبة ف التصالح مع النفس أو الآخرين مش فارقة .. المهم إنها حاجة كويسة .. بس الحاجة المحبطة ف الموضوع إن احتمالية إني أعملها شبه مستحيلة .. لأسباب خارجة عن إرادتي .

وبالمناسبة برده .. أنا لسة ف سيزون 2 ف هاوس ومش عاوزة أفقد شغفي بإني أتفرج عليه .. رغم إن مستر دارسي خرجني عن شعوري وبقى هو تسليتي الوحيدة لما بكون زهقانة .. بس لأسف نوبة الغيبوبة اللي بتعتريني بعد كل يوم كلية مرهق فحت مانعاني أعمل أي حاجة .. وللأسف الوجع اللي من كل حتة ده مقفل جدا بس على مين .. هنام شوية وأصحى زي الحصان :)

----

لأن كل شئ لا يعدو أن يكون مجرد فكرة ، 

حتى أنت 

أتقنت لعبة الخيال ، 

فهي على كلٍ لعبة بلا خسائر 

فقط تعطي بعض الأمل في غد أفضل .. بعض الأمل الذي لا يضر.

----

عشان لو كل واحد اتوجع أو خاد على قفاه من الدنيا مرة وقفلنا على نفسنا مش هنعرف نعيش لوحدنا .. وعشان التفاؤل مش مجرد كلمه .. ده له أساس .. مش هتفاءل بس وخلاص عشان مكتئبش .. لأ هتفائل علشان فعلاً فيه خير وربنا كبير وكريم أوي بجد .. وإن الحياة حلوة لما تشوفها منورة .. فمن منطلق هذا المبدأ ..

بكرة هيبقى يوم جديد .. بكرة يوم سعيد 

:)




هناك 6 تعليقات:

  1. الف سلامه عليكى بس ما تجيبيش سيره الواد دارسى ده عشان بينرفزنى D:

    عموما ممكن تقرى مصرع احلام مريم الوديعه : واسينى الاعرج

    حاجه كدا من ورا العقل يعنى :)

    ردحذف
    الردود
    1. هدور عليها :) .. وماله بس دارسي ده عسول :D

      حذف
  2. عسول ؟؟؟!!!! ده خنيق و سيس و بعدين عشان مانخسرش بعض خلى كل واحد يحتفظ برأيه فى دارسى لنفسه D:D:D: بس بردو هو خنيق D:

    دورى عليها على النت لانك غالبا مش هتلاقيها فى استورز

    بط ترسط مى يو ويل لايك أت # انجليزى هريدى D:

    ردحذف
    الردود
    1. بس ده ميمعنش إني بحبه :D::D
      هدور عليها حاااالاا :))

      حذف

:)