2012-09-09

أنا راح غنيك ..



بقالها ساعة معملتش حاجة .. بتلف في كل الصفح وبتقرأ كل الكلام ومنطقتش غير كام كلمة على بعضها من ساعة مصحيت .. جربت تعيش حياتها الواقعية على النت كمان .. جربت تشوف هي هتبقى عاملة إزاي لو قفلت عقلها زي مبتقفل بقها عن الكلام طول اليوم .. وكانت النتيجة تقليب على اليوتيوب على ناس بتتكلم وتغنى وترقص .. دعبسة ف بروفايلات ناس بتحبهم تطمن عليهم وتمشي من غير متقول سلامو عليكو .. نطت على كذا بلوج جديد وجربت تقرا حاجة مناقضة تماماً للي حاسة بيه .. وعلى عكس المتوقع .. استمتعت أوي .. خرجت من المود شوية .. واكتشفت حاجة غريبة .. إنه مهما كان الموضوع اللي بتقراه بعيد كل البعد عن اللي هي حاساه لازم هتلاقى حاجة تربطه بيها .. ولو ملقيتش حاجة مش هتقرا للشخص ده تاني عشان معرفش يخليها تحسه جواها ..

 مبيفرقش معاها كتير لما تتكلم حد يفهمها .. وبيبقى كفاية عليها -أحياناً- المعنى الصغير اللي وصلهم من كلامها .. محدش بيركز معاها وده شئ كويس .. لأن لو ركزوا هيتعبوا .. ويمكن يزهقوا .. وممكن يشوفوها معقدة زيادة عن اللازم عشان بتدخل جوا أوي لأماكن محدش دخلها قبل كده .. بتفتكر دايماً طنط اللي كانت راكبة معاها ف التاكسي وكانت بتوصف للسواق الطريق المختصر عشان يوصل أسرع .. وقد إيه كانت متفانية في الوصف والدقة وبتتكلم بحماس كأنها بتحل أزمة فلسطين العالقة في الأمم المتحدة .. مش قصدها تريقة والله .. بس أصل هي كان نفسها تبقى كده  زي طنط دي .. يبقى كل حماسها وتفانيها في حاجة بسيطة .. متبقاش مكلكعة الدنيا دايماً .. كان نفسها تبقى زي مبيقولوا more shallow عن كده ..

خلصت امتحان امبارح .. ومعندهاش فكرة هي عملت ايه ولا هتعدى ازاي بعد الإبداع اللي حصل .. وغالباً مش فارق معاها ومبتحاولش تفكر .. جربت تكتب عشان ترتاح من المشاعر والكراكيب المتكركبة من قبل أيام المذاكرة واللعبكة اللي موجودة جواها بس لقت نفسها بتكتب برومانسية زيادة .. عن حد ماسك إيديها وساكت وبعينيه بيقولها متقلقيش .. عن حد بيسمع صوت قلبها وبيرد عليها بشوية دفا مع كوباية شاي بلبن عملها عشانها .. عشان الدفا يبقى بزيادة حبتين .. عن حد بيشغلها أغنية بتحبها بتهدي أعصابها وترجع ابتسامة هادية بترسمها الأغنية دي لا إرادياً كده .. حست إنها مأفورة فمسحت الدرافت ورجعت للدعبسة الصامتة ..

هي عارفة إنها غلطانة .. ولما بتبقى غلطانة مبتعرفش تختلق أعذار عشان تخرج نفسها من الموضوع .. بتقول آسفة بجد وبتسكت بعدها .. مش بتحس بإهانة ولا أي حاجة من اللي بتعملها كلمة آسف عند بعض الناس .. بس هي بتقفل على نفسها شوية عشان تصلح الغلط اللي حصل ده .. عشان تشوف المشكلة فين وتعدلها .. مبتبقاش زعلانة من حد قد مبتبقى زعلانة من نفسها .. مبتقدرش تتكلم وهي حاسة بالذنب فبيطلع صوتها واطي وهادي .. صوت مش عايز يطلع بس مُجبر .. بتاخد وقت علام ترجع وتنسى اللي حصل .. وبتحاول على قد متقدر تثبت للي غلطت ف حقه إنها عارفة إنه غلط .. وإنها مش هتعمل كده تاني أبداً ..

بتسمع أميمة خليل اليومين دول كتير شوية .. كتير زيادة عن المعتاد يعني .. وده مرتبط أكيد بحاجة هي مش عارفاها ومش فايقة تدور عشان وراها حاجات كتير أهم .. زي إنها ترتب الأوضة وترجع كل حاجة مكانها .. وزي إنها تفتكر معاد الدكتور عشان صحتها اللي بتتدهور من غير سبب .. وإنها تفتكر تجيب كتابين لدكتور أحمد خالد توفيق ورواية حلوة تخليها تعيط أسبوع كده .. وإنها تعمل حاجة بإيديها لشخص عزيز عليها والأهم إنه مستنى منها الحاجة دي .. عاوزة ترسم هيلين أوف تروي او أي حد مش مهم مين .. وعاوزة تمشي في الشوارع لواحدها وتجيب جليتر لونه فوشيا .. مش مهم هتعمل بيه إيه بس هي أكيد هتحتاجة عاجلاً أم آجلاً يعني .. 

المهم إن في الآخر لازم تعدل كل حاجة معووجة وتصلح أي حاجة انكسرت .. هحاول تبص لوشها ف المراية لما تبقى مدايقة ومش هتهرب من المواجهة .. هتحاول تقلل من مواقع التواصل الإجتماعي وتجرب تعيش حياتها الطبيعية وتبقى نفس الشخص على النت كمان .. صحيح مش هتبان مع إنها موجودة .. وصحيح مش هتتكلم مع إن جواها كتير .. وصحيح شوية والناس هتنسى رغيها ويمكن كمان متسألش هي راحت فين .. بس هتفضل تدعبس على اليوتيوب على أغنية جديدة ترسم إبتسامة لا إرادية على وشها .. وهتدخل بروفايلات الناس اللي بتحبهم تطمن وتمشي من غير متقول سلامو عليكو .. ولما تلاقي حد محتاجها مش هتتأخر .. وهتنعم بشوية ملل ووحدة مهمين أوي دلوقتي .. وهتحاول المرة الجاية متنساش .. ومتغلطش .. والأهم إنها متبطلش تسمع أميمة خليل عشان صوتها فيه دفا .. دفا محتاجة منه شوية عشان تعرف تتنفس ..

*العنوان من هنا

هناك 4 تعليقات:

  1. هو أزاي كلامك ده كله بيحكي عني..

    وأزاي لقيت مدونتك صدفة في نفس الوقت اللي بعيط وعاوظه أثول كل الكلام ده ومش عارفة أخرجوا..

    تحياتي لكل كلمة بجد حستها لأنها بتتكلم عني..
    أكيد هدخل مدونتك تاني :)

    ردحذف
  2. المهم إن في الآخر لازم تعدل كل حاجة معووجة وتصلح أي حاجة انكسرت ..

    ردحذف
  3. ضحى بالعربيه العاميه !!! حمدالله على السلامه D:
    اخيرا خرجت من بوست عندك فاهم حاجه D:

    ردحذف
  4. مبسوطة بالنهاية :)

    ردحذف

:)