2012-03-10

هلوسة فراغية معتمة !



- أهمية إنك تاكل شيبسي في وقت زي ده بتتساوى مع اهمية إنك تشرب نسكافيه وتبقى عاوز تنام .. 

- " حاجات كتير
ف حياتي 
اللي فاتت
راحت
بس لسة 
عندي أمل فيها
عشان كدة
الوردة الميتة 
ف بلكونتي
مع إنها خلاص ماتت
يوماتي بسقيها "*

أهمية إنك يبقى عندك كتاب زي ده .. إنك كل أما تزهق من المذاكرة - ده إذا كنت بتذاكر أصلاً -  تقرا فيه شوية وتضحك ..أو ممكن تكتئب لو كلامه جه عالجرح .. أو ممكن يكل برود تبصله وترجعه مكانه ولا كأنه أثر فيك .. ولا تعبك من جوا بكلامه الملخبط .. وبرجلك !

- أهمية إن يكون عندك بلوج عبيطة زي دي .. إنك تكتب فيها كل ما هو عبيط ولا يمط بحياتك المبهدلة بصلة ..

مثلاُ مثلاُ .. أنا اشتريت الشيبسي المذكور أعلاه بنكهة الطماطم .. مع إنها ليست المفضلة .. بس جبته من باب التغيير .. كمان عشان الشيبسي بقى المأكول الرسمي للإكتئاب .. وأكيد أكيد يعني ده موضوع عبيط .. مين في الدنيا دي هيهتم أنا جبت الشيبسي بطعم إيه .. ولا أنا جبته ليه .. حتى الكيس نفسه بقى بيبصلي باستنكار من فوق لتحت - حلوة استنكار دي - عشان فتحته وسيبته جنبي ومكلملتوش .. ! 

- هي ليه كل حاجة مش طايقاني كدة ؟! .. العالم مصر يعاندني .. حتى الأرض بتزحلقني .. !!

- وكأن قدمي الصغيرتين 
مخلوقتان للإنزلاق*

- دي حقيقة 
أنك بتشوف الدنيا بعينيك إنت 
وعينيك منفدة على جواك
فزي مانت حاسس هتشوف 

ولو طبقنا هذه النظرية على الجملة المذكورة أعلاها .. هنلاقي إن السبب نفسي عميق وهو إني حالياً مش طايقة نفسي لأني مؤخراً مش على طبيعتي وملخبطة ومبرجلة ودايماً بحس كل حاجة فوق دماغي مع إني لو فعلاً دققت شوية مش هلاقي حاجة أصلاً بس أنا اللي شايلة الهم أو يمكن عاوزة أشيل الهم شوية .. أو يمكن لا ده ولا ده .. أنا بس مش كويسة .. وعشان كدة كل الأفكار الخزعبلاتية الشيطانية دي بتطلع فجأة .. وياربت لو حد عنده حل يقولي .. !

- من غير هزار .. أنا فعلاً بفكر جدياُ أروح لدكتور نفسي .. 
آه .. وأغير كورس الفارما .. !

- هي ليه الحاجات الصغيرة التافهة العبيطة دي مدايقاني ؟!! .. يعني هو خلاص مفيش حاجة تانية تستاهل كدة أزعل عليها !! 

- العالم .. كوميديا لمن يعقلون
وتراجيديا لمن يشعرون *

مفهمتش ..
 المفروض أضحك دلوقتي ولا آخدلي جنب وأعيط ؟!! .. 
طب أقولك على حل أحسن .. أنا هعمل زي القرد المجهول المبسوط ..
وأطنش ..

- نعيش زي الفلاسفة تعساء .. 
ونحاول نفهم الفولة
ولا خلينا كدة
بلهاء 
سعداء
بالدنيا المجهولة *

- أنا مش عاوزة أفهم حاجة .. أه وربنا نفسي كدة مفهمش .. عشان كتير الفهم بيزعل .. وكمان بيبقى رخم إنك تفهم حاجات اللي قدامك مش فاهمة .. أو إنك تحس إنك غريب ومتشرد في الدنيا دي ومحدش فاهمك .. أو يمكن هما كلهم فاهمين وانت الوحيد العبيط .. اللي مش فاهم أي حاجة  !

 - افتكرت فيلم اسماعيل يس لما كان في مستشفى المجانين وواحد بيقوله هما برا المجانين واحنا هنا العاقلين .. علشان كدة حبسونا .. 

- أنا عاوزة الحياة بسيطة وسهلة ..
التعقيد بيلخبطني .. 
ومش كويس عشان صحتي .. !

- أن تكتشف أنك حالة شاذة عن القاعدة العريضة الواضحة .. 
زي الخروف اللي بعد عن القطيع .. في أي لحظة معرض إن الذئب ياكله .. !

- هو أنا ليه معشتش طفولة سعيدة ؟! .. يمكن عشتها .. بس برده سؤال .. ليه مش فاكرة منها غير غلطاتي ومشاعري الكئيبة .. ؟! 

- حاسة إن مشكلتي مشكلة فهم ذات ودوران حولين فكرة واحدة وحيدة .. أنا إيه اللي جابني هنا ؟!

- بقالي كتير مقريتش لحد حاجة .. مش بتابع حد .. مش عارفة ليه بس نفسي مش مفتوحة على الدنيا زي الأول !

- مش عاوزة أتكلم في الموضوع .. مش عاوزة أفكر ف حاجة .. مش عاوزة أفتكر .. مش عاوزة حتى أعيش اللحظات دي تاني .. عشان لحظاتي دلوقتي لا تقل سوءاً عن اللي فاتت .. فمش ناقصة !!

- بيبقى نفسي أتكلم عنك .. بس معرفش ليه .. بسكت !

- ورايا مذاكرة ولو نمت يبقى حصيلة اليوم صفر .. 
وورايا حاجات كتير بكرة ولازم أصحى 7 الصبح .. 
ومش عارفة أقرر ..

- يعني إيه أمل ؟! .. حالياً معنديش أي فكرة !!

- هو أنا مش مدايقة .. ومش مبسوطة .. ومش زعلانة .. ومفيش حاجة .. مفيش أي حاجة خالص ..
 أنا فاضية من جوا .. وبس !

ــــــــ

* خالد كساب ، أنا راعي بقر وحيد
* سوزان عليوان 
* جملة لمجهول .. أو على الأقل أنا معرفوش
*وليد طاهر ، حبة هوا

هناك تعليقان (2):

  1. احم
    مش عارفة اعلق اقول ايه
    بض النظر عن ان البوست رائع وتحفة وحسيته اوي و و و وكل صفات المدح
    وبغض النظر برده عن ان معظمه ان لم يكن كله بينطبق عليا .. حتى حتة اني ورايا مذاكرة ومفروض اصحى 7 الصبح وشوية الحاجات دي :)

    بس انا بحييكي بجد .. مش علشان السببين اللي فوق
    لكن علشان عاجبني اسلوبك وكلامك وهلوستك وكل حاجة
    تحياتي ليكي :)

    ردحذف
  2. ;D ليه وراكي مذاكرة زينا كدة ؟؟ :] أنا كنت فاكرة بتوع طب المنحوسين هما بس اللي بيذاكروا ويصحوا الساعة 7 :D

    بجد نورتيني ..
    شكراً ليكي :)

    ردحذف

:)