2012-02-18

Sometimes I feel like a sad Song



عندي امتحان بكرة 
ومكملتش كالعادة
وهتنزنق برده كالعادة 
وهطبق برده عشان ألحق أخلص برده برده كالعادة 

بس الفكرة في إني من حبة صغيرين مكانش ليا نفس أبص في وش الكتاب المبجل بتاع الباثولوجي
ودلوقتي بعد كوباية النسكافيه المتينة ( مع إني مبحبش النسكافيه ولا بطيق ريحته )
وبعد مطمنت 
وفرحت إن ربنا استجاب لدعوتي 
مع إني عارفة إن في ناس تانية برده ممكن تكون دعت برده 
بس أنا فرحانة عشان كل حاجة تمام 
وإني ساهمت حتى ولو بدعوة صغيرة في إنها تبقى تمام ..

وبطريقة غير اعتيادية وغريبة 
أنا مش قلقانة من امتحان بكرة 
ومش فارق معايا الدرجات 

وعشان حاسة إني عملت السنة دي أحسن 
وعشان دايما لما حد يكلمني وهو قلقانة بقوله نفس الكلام اللي محتاجة أقوله لنفسي
فبطمن 

----

لسة عندي خوف ورهبة ومش عاوزة أقابل حد
وعاوزة أختفي 
وأتقوقع في صومعة لوحدي شوية 
معرفش هعمل إيه
ولا أنا محتاجة كدة ليه 
بس أنا حاسة بإني عاوزة أستخبى 
وكوني بعيدة دلوقتي عن ناس كتير
وقافلة تويتر والفيس
وحاسة بعزلة حتى في البيت
بس مرتاحة 
ولحد محس إني محتاجة أرجع وأواجه الدنيا تاني
هفضل مستخبية 
بس مش هبطل أطمن عليك 
ولا على كل الناس اللي بحبهم .. ودايماً بدعيلهم ..

----

جارنا توفى النهاردة 
اللهم ارحمه وأسكنه فسيح جناتك
واغفر له ولموتى المسلمين جميعاً يالله ..

----

بالنسبة لي الموت دلوقتي هو مجرد حياة تانية 
وعشان أتنقل هناك لازم أسيب الماديات اللي محاصراني دلوقتي
اللي مقيداني وحبساني جواها
وطبعاً مش هتبقى سهلة 
وفي خوف
ورهبة من اللي جاي وراها ..
بس في كل لحظة لازم أعمل عشان اللحظة دي ..

مش عايزاها لما تيجي تجيلي على غفلة وأنا مش مستعدة ..
عايزاها لما تيجي أبقى فرحانه .. سعيدة .. وراضية .. !

ودي مهمة صعبة أوي .. !

----

"أنا أكثر ذكاءً مما يوحي به مظهري
وأقل ذكاءاً مما يظنه بي الآخرون "

جملة عبقرية لدكتور أحمد خالد توفيق 
مش عارفة هي  مظبوطة صح ولا لا .. ومش فاضية أضور 
بس مش مهم
المهم إن المعنى يكون وصل !

----

كنت سعيدة إني كانت ليا فرصة إني أسلم على دكتور احمد خالد توفيق مرتين .. وهو بيكرمنا في حفلات الكلية .. 
شعور غريب لما أقابله صدفة في دور من ادوار الكلية وأبقى نفسي أسلم عليه وأقوله I'm a Big Big Fan 
بس شعور غريبة برده إنه دكتور في نفس الكلية اللي أنا فيها وكان بيروح نفس الأماكن وبيسمع نفس الكلام وبيذاكر نفس المذاكرة اللي أنا بذاكرها دي .. 
نفسي أعرف كان بيذاكر الباثولوجي إزاي ... ؟! :D 

----

يلا بقى بجملة الدكاترة وبما إني مشروع دكتورة وبما إني برده مش عارفة المشروع ده رايح على فين .. 
بس أنا عندي أمل إني ممكن في يوم أقابل باسم يوسف وأسأله سؤالين ::

1- بيجيب البدل دي منين ؟؟!! :D 
2- هوا أنا ليه اللدغة بتاعتي مش حلوة زي بتاعته كدة ؟!! 

---- 

عاوزة أبقى أفتكر أحط شعار "معاً من أجل مستقبل ألدغ " في المدونة وأفتخر ولو لمرة ف حياتي إن حروفي 27 بس مش 28 زي بقيت الخلق !

----

* ملحوظة لا تهم أحداً سواي ::

لما كتبت في يوم وقولت .. "
من دون أن يراها حاولت أن تنظر إليه .. علها ترى إبتسامته !
في الثالثة بعد منتصف الليل .. شعرت بوخزة في قلبها .. أحست أنه يحبها بشدة .. أنه يطلب منها أن تبادله المشاعر .. أن تعده بأن تكون له مهما حدثت .. إزداد ذلك الشعور مع كل ثانية تمر .. لم تتمكن من المقاومة .. فأخبرته بقلبها الضعيف أنه لم يعد ملكا لها .. منذ وقت بعيد !

حين هدأت أنفاسه أخيرا .. أخذ يتذكر ما حدث .. تذكرها حين رآها أمامه فلم يكن منه سوى تلك الأفعال الطفولية الساذجة السعيدة .. لم يعرف كيف صدرت منه .. لكنه ابتسم من أعماق قلبه .. أخرج ورقة صغيرة طبع عليها قبلة حارة بعد أن كتب فيها
" إلى فريدة .. أول مرة أعملها "


كنت بتكلم عنك .. !


----

Sometimes I feel like a sad song

أغنية حملتها امبارح بالصدفة .. 

EnJoY IT


:)


----


* بمناسبة الصورة ومي فايفوريت دوكتور .. هاوس 

 Pathology Question : Can You Enumerate the Causes Of rectal Bleeding 
Me : Yeah , Kicking Patho's Ass 
!! 

ليست هناك تعليقات:

إرسال تعليق

:)